Uang Suh la, Uan chhan ni zawk teh

Uang suh la, uan chhan ni zawk teh

Joseph Lalrinawma

Kan Lalpa kum 2012-2015 chhung khan he zirna run bel hian mutbu nen ka lo lum lut ve thin a. English Department ah ngat phei chuan mipa Graduate hmasa ber kha kan ni ve tlat. Pathian awmpuina changin hlawhtlinna pawh kan chang ngei a, ba nei lovin (Cafeteria-a ka ba pawh ka pe vek) kan chhuak ve thei a. Mahse kan sulhnu ka han en let hian kan tih tak loh avanga ka inchhir em em te leh kan tih tak avanga pawi ka tih em em a lo awm ve nual mai. Kan hnung ami te hian engtin nge min lo sawi zui ang aw tih ka ngaihtuah chang phei chuan khawsik tur ang mai a ka awm chang a awm tlat nia mawle.

Kum thum chhung kan lo awm ve chhung khan theihtawp kan chhuah ve in kan lo inhria a. Thawm pawh kan ngah khawp mai. Sir John-a ho a  ‘Intuition’ kan han inhrilhfiah siak phei kha chu kan thawm tha tak ani. Uniform Smart tak mai haa han lenkual vel kha chu Lunglei ah ngat phei chuan pawimawh ber ang hrimin tarmit dum kan vuah lo chauh kha ani ve tak meuh a. Mahse kan nihna tak a lan chuan kan Principal in lu chunga kutnghat meuha a tawngtaisak hnu, “Hypocrite” kha kan ni tlat. Pathian thu kan han zir ve hnua Isuan “Hypocrite” a tih te ka han ngaihtuah chian phei hi chuan ka la tim uai uai thei. Action song kan sak laia Sir Rinawma nen kan han inzuansansiak thin te kha a ropui a, a nuamin ahlimawm a, mahse hriatreng tlak nihna chhan a tling hauh lo. Kan class in Bookmark siama kan han hnatlangte kha thiam kan inti ve khawpa, kan thei ta ber emaw tih mai a awl khawp mai. Gym-ah thir hlum lian pui pui kan han nam kang ve te kha a lo hlu khawp mai. Ka awm ve chhung khan vawikhat mah class thulh ngaia damloh ka nei hauh lo.

Mahse ka ngaihtuah let a he ‘Ka College’ tih ngata ka koh ve thin tan hian uan chhan tur ka nihna pakhat mah ka hmu ta tlatlo hi na ka ti khawp mai. Kum thum chhung hun khan eng the ual mah kan college tan ka lo tilo tawp mai tih ka inhrechhuak chiang khawp mai. Hun in a hril anga nakinah chuan engemawah chuan ka la inchan ve mahna tih chauh hi ka innghahna a ni ta ringawt mai. Ka lo uanpui ve em em mai tan hian uan chhan ka tling ve ta tlat lo mai. Hun a ral anga Jakob-a fapa Josefa hre lo Lal Pharoa a lo awm ang deuh a, kei Josepha min hre miah lo zirtirtu an awm hunah chuan hawi sang vaha, ‘Ka College’ tia a chhung dai leh turin engmah hawisan chhan tur hnutchhiah ka nei tlat lo.

Zirlai ka la nihna chauh hi HATIM tan a beiseina ka awm ve na chu ani ta ringawt mai hi a pawi ka ti hle a, hemi kawngah tal hi chuan HATIM chhul chhuak mi pakhat tling ka nih ve ngei chu a ngai dawn ani. Mahse hun la neite tan chuan theihtawp chhuahna hun a la awm tlat ani. Keini ho hunbi chhiar chu a kin tawh a, eng kan ti thei ta lo chu ani ber e. Hun la neite erawh chuan theihtawp chhuah tak meuh ula tiin ka chah duh tak zet che u. Kei ang hian in chhuah hnuah i uan chhan i hmuh in i insit ve palh ang tih ka hlau takzet ani.

Nakinah chuan he college hian, Lalpa lung kan tih awi chhung chuan, hma lam panin kan la kal zel anga. HATIM chhulchhuak fak tlak te din tlar tir an nih chang te a la awm anga, i awmlai hun chhung emaw i chhuah hnua HATIM tan engemaw tal i tih ve si loh chuan mahni thuthmun a kut beng ring satliah i nih hun a la thleng ve ngei ang. Chu tih hun chuan Pu Thangkura tawngkam takin i level pui i phak lohni a lo la thleng ang. Zahna chang i la hriat loh zui ngat phei chuan beisei bo tur pawh i awm lo hial ang. Eng Jubilee emaw te kan lawm hun a la thleng ve anga, sawmna lehkha mawi dawng pha ho dawhsan a inhrilhru pah a an suih san san hun a, a tlar hnung a vawksa thau ei hun nghaka kan thut dun vaih zawngin kan college kal laia kan classmate te lo din lai a kut inbenrinsiak bak tih theih kan nei hauh lo ang. I fate leh ka fate hi kan thiante motor khu hak a hritlang an nih hun phei chuan he college lam hi nang leh kei hian kan hawi ngam tawh kherin ka ring hauh lo.

Kan vengah ka huai ber tih ringawt hian nang leh kei hi khawi lai atang mahin Doctorate Degree min pe dawn lo hul hual. Vai velh tam lamah lah Master Degree a lo awm miah lo leh nghal. Bhawan leh Hnam Run tlan pel zo lo kan nih phei chuan kan chanin Maian chan pawh a tluk hauh lo ang. Inchei peih ber award te hi a la awm ve ngai anih chuan tih dan dan a la awm anga, chu lah chu a awm loh hmel ropui si.

HATIM hian Bible chang tha zet mai tlawhchhanin hma lam kan pan mek a. Rom 11:36 thu, “Amah atang leh, amah avang leh amah atan thil zawng zawng a lo awm a ni si a; ama hnenah chuan chatuanin ropuina chu awm rawh se. Amen” tih thu hi kan innghahna chu ani. Thil zawng zawng chu amah atanga lo awm anih si chuan amah chu hmang thiam ila, kan thlen chin atang hian hma I sawn zawk ang u. Kan college tan chauh ni lo kan Pathian tan hian Joba anga uan chhan tlak hi kan ni thei theuh. Chu theihna pawh chu amahah bawk a lo awm reng mai. Kan thiamna hmanga kan College leh Kan Pathian chawimawi kan duh anih chuan Lalpa tih hi a bul ani tho mai (Thuf 1:7). Hmun sanga din ve I duh em? Thufingte 4:8 chuan “Chawimawi la, anin a chawi sâng ang che; I lawm chuan zahawmah a siam ang che” tiin a lo sawi a, amah atang bawkin a lo chhuak leh dawn anih chu. Lalpa i chung a a lawm chuan hmasawn tura chakna i nei ngei ngei ang (Neh 8:10b). Harsatna hmunah pawh Pathian vek hi a lawm miau chuan i himna a la ni anga(II Thes 3:3; Sam 121:3), phatsana i inngaih hunah pawh i tana rinawm reng chu Pathian bawk ani ang (Deut 7:9). I auh hun chuan I bulah a awm anga (Sam 145:18), i dil chu a ngaihthlak sak reng thin ang che (Jhn 16:24).

He College avang hian uang mai lo la, College leh Pathian tan Uan chhan ni zawk teh.