HATIM..HATIM..HATIM…

HATIM..HATIM..HATIM…

  Joseph Lalrinawma

      VI^th Semester

Department of English

Kan Lalpa kum 2012na Nikir thla ni 15na ah he zirna run ropui bel tur hian ka mutbu nen ka thawk chhuak ve a. Dai ngai loh ram dai tur ka nih avanga huphurhna tinreng nen, a parual runpui chu ka pan ve ta ringawt a. Keini batch zingah a lut hmasa ber ka ni a, ka hmelhriat ka hmuh hmasak ber chu Gopin Murmu, Cook kha ani. BHSS lam a ka lo tlat pui tawh te an lo awm ve nial bawk nen tlem chuan huphurhna chu a zia ta deuh. Kha ni atang khan Hatimians zing a chhiar tel ka ni ve ta. Hatimians nunzia ka lo ralkhat hriatte kha ka ngaihtuah let a, ‘A then pawh kan hre lo, he lui kam atang hian’ tih kha bang lo a sa mai tur ka lo ni.

                HATIM ka rah hmasak ber tum a min khawih em em tu ka tawn hmasak ber chu kan senior zing a mi pakhatin ka hming a hriat loh avanga “Brother” ti a min ko kha ani. He hmun a ka zir chhuah ropui tak chu inunauna hi ka ti lo thei lo. Khaw hrang hrang ami, mize inang lo tak tak, Pawl 12 pass tawh chin thiau kan awm khawm ani a. Induh tawk tak a lu ling vawh vawh hmuh tur an lo awm miah lo kha mak ka ti tak zet ani. Unau tak tak ang in kan khawsa ho a, nun a nuamin, chen ho a nuam takzet bik ani. HATIM a awm chhung hi chuan hei hi reh tawh lo se ka ti takzet ani. Mizoram hmun tin deuh thaw ah thlenin tur ka unaunute leh unaupate an awm ta fur mai hi a va thawventhlak tehlul em!

                Lehkha kan han zir tan phat a zirlai leh Zirtirtu ka hre hrang lawk lo kha ka buai hman a. Mahse zirlai leh zirtrirtu kan inbuk tawk em vang zawk a lo ni a, min vil hneh khawp mai. Class kan han la a, an thusawiah an cheng ani tih hriat ngawih ngawih zirtirtu hmel han hmuh hi chu hahdam thlak tak ani. Kan hriatfiah loh hlau tak chung a a fiah thei ang ber tur a awki leh chezia nen lam a an han tang tak tak hi chu hmuhnawm thlir a thlir tur pawh ni ila an iaiawm thlawt lo. A tawpah hi chuan kan fiah leh kuar nge nge zel. Kan thiam chian loh a lo awm palh leh a Hahuk kai atanga a Chepa kai thleng rawk an sawi nawn leh peih zel a, a chipin an chip nawn leh thlap peih zel hi ka fak tawp lohna tur ani.

                Pawl 10 hnuailam a inzirtir awm tawk lek a kan ngaih hun vawn dik, tawngkam mawi, pheichheh mawi nen lam a mingo nun ngai lo tur khawp a min han hrilh nawn leh thlap peih tu Principal hi sawi tel loh theih ani lo. HATIM hnuk hi zawng teh min ti sela kan principal room ah ka tlan lut nghalin ka ring thin. Hetiang ho lutuk ang a kan ngaih hi a lo tul zia kan hmu nitin ta mai a. HATIM pawn han rap chiah ila mizote inzirtir kan ngaih zia kan hmu deud deuh thin. Kan pi hian chaw tha min lo fah a lo nih ngei hi ka ti lo thei lo ani. Kan thutdan nen lam min sawisel peih thlap hi kan ning dawn thin a, nin chi alo ni awzawng lo tih ka hre ta, zawm chi zawk a lo ni.

                Thlarau nun min enkawl sakna ah hian ani chung Pathian hi a lawm dawn em a ka hriat thin ni ka ti thin. Pathianni a lo thleng a room devotion nen a chhiar phei chuan inkhawm vawi 4 kan han nei nghal pap mai zel te hi a va lo tha tehlul em. Chanvo hrang hrang kan han insem a, mahni khua a chaw ei dawn pawh a tawngtaina vawn sa sawi nawn tluk tluk thin khan, thawhlawm kan hlan te a lo ngai a, midang kan hmelhriat chu sawi loh hetiang mi hi an awm ani tih pawh kan hriatlohte tan pawh tui tak a tawngtai thei a kan chhuak pawh hi a va hlu tehlul em. Dam loh hnihkhat a lo awm lo thei lo a, Residence zawng zawngin min tawngtaipui ani tih han hriat te hi a va thlamuan thlak tehlul em. Tuktin mai a Pathian hnen a inkawltirna kan han nei thlap zelte, tlai lam a lawmthu sawina leh mamawh thlenna hun kan han nei leh ziah te hi man a lei chi a ni hauh lo, cheng emaw Dollar, Pound pawh nise lei zo a awm lo. Nitin mai a benga Pathian thu a luh hrim hrim chuan thinlung thleng tawk a awm lo thei lo. Tu pa emaw tih dan takah “Thawk vek lo mahse a thawk tawk a awm hrim hrim”.

                Ram tam tak Kumpinu sorkar kan tih mai, Mingo Lalram hnuai a lo awm tawh ten harsatna kan neih in ang deuh zel chu Sap tawng kan tih kan hlau tlat hi ani. Kan tih dik loh kan hlau a. An buh hmun kan rin pui Vai tawng hmang ho lem kan duh tawk in kan lo be nawmnah lawi si anih hi. Mahse HATIM ah chuan ‘Saptawng kan hlau hman lo, hlau hman kan ni hek lo!’. A chhan chu maw hman loh theih ni hek lo! Kan hman loh miau chuan kan tawng thei lo ani ngawt mai dawn si a, hlau hman kan ni lo, hman nghal zel angai tlat. Pathian a innghah tih loh ah chuan hei hi HATIM thil tih fuh ber pakhat ani ngei ang. Mingo leng an lo kal in tuman biak kan hreh tawh hauh lo. An tawng awmzia kan hre miau a. Thenkhat phei hi chuan he lai a lo kal nazawng ai hi chuan an tawng lo irh chhuah dan pawh kan hre zawk fe mai thei asin! Ka la hriatreng chu UESI Worker Sister Salme thusawi kha ani. “HATIM ah chuan ka duh ka sawi min hriatthiamsaktu rual in awmkhawm a hei hi nuam ka tih na ber ani” a ti ve hial anih kha. He rohlu tak kan thinlung a min tuh sak hi Zoram kan pelh hun ah a hlutzia hi kan la hre dawn chauh niin ka hre thin.

                Uang pui chang suh ila Mizoramah hian hetiang ang college hi hmun thum, hmun li velah nei ila chuan Zoram pawn atang pawhin ‘Zoramah finna a awm’ tiin an lo luang lut ngeiin ka ring thin. ‘Pathian kan lama a tan chuan tuin nge min do thei ang?’ tih kan Pathian thu in chiang tak in a sawi a, Zirlai leh Zirtirtu leh thawktu zawng zawng ten hei hi kan vawn nun chhung chu HATIM par hian chuai ni anei ngai dawn lo ani. He hmun a kan tawngtaina hian damlo engzat chungah nge Pathian a koh chet tawh a, engzat in nge kan tawngtaina hi lo nghak awm thin le tih hi chhut ngun ila, kan Pathian hi kan lam ah atang zel anih phawt chuan kan vul zel ang. Nimahsela HATIM hian kan Lalpa lung kan tih awi loh ni chu kan tluk chhiatni tur ani tih I hre theuh ang u.

                Eng vangin nge HATIM hi ka belh tih hi zirlai zawng zawngten in chhut nawn theuh teh ang u. Kan hmabak chanpual hlen zel hi min tirtu duhzawng a nih si chuan keini pawh hian tih tur kan nei ani lawm ni? HATIMIANS ten kan hmabak chanpual kan hlen hun hi min tanpui reng tu kan Pa lung lawmna kan siam ni a ni ang a, Ama lawmna siamtu te kan Pathian in malsawmnaa a vur loh ka hre ngai lo.

 Zoram hian keini hi min nghak ani tih hria ila, kan ram hi na tuarin a rum mek a, chhantu a mamawh ngawih ngawih ani. Keni Mizote hi ani lawm ni kan ram tan a ding tur chu? I zirlai kha thiamna tak tak nen lo zir chhuak hram teh. Zoram hian tuam damtu a mamawh em hi. I ram pawh I hmangaih zo lo anih chuan mihring piang tawh a zawng a mi vanduai ber ini ngei ang. HATIM in keimahni a min tuhsak hi kan ram tan a hmang thei tur in I in buatsaih ang u.’ Mizoram mi ka ni tih I faten an zah hun a thlen hun chuan I tu te chuan zah avangin I hming an lam ri ngam tawh lo ang a, an fate lehchhawng chuan I thlan chungah anchhia an lawh tawh ang che. Zoram natna hi I hmu a, I hre bawk a I theihna zawn ah rawn pen ve hramm ang che.

HATIMIANS te kan ramin nghakhlel takin min thlir ani. Hawh u I ngaihtuah tlang teh ang u,nuam tawl hman kan ni lo. Kan theihtawp chhuah a kan ram tan kan zir a hun ta takzet e. HATIMIANS KAN RAM TAN I PEN ANG U.