OPEN LETTER TO ZUALI

 OPEN LETTER TO ZUALI

                                                                                                        

C.Lalhlimpuia                                                                                                                         4^th Semester                                                                                                          Department Of Social Work

                                                                                                                                                                                               

                     Lowrian Hostel-a kan awm lai khan, Mizoram Hmar-Thlang lam thingtlang khaw chengker ve deuh atanga lo kal, kan thianpa Chungnunga hi a awm ve a. Keini ho kha thingtlâng kalkhawm tih takah kan inkawmngeih tlâng a, kan titi duh zawng pawh a rual thin hle. Tumkhat chu he kan thianpa Chungnunga hian High School zirlai pakhat hi a bêm ve a, chu nû Monica Lawmzuali (Zuali tia an koh thin) chuan "An khaw awmna a ril  êmai..ka duh lo ni phawt rawh se"  fiamthu ti tak hian alo tih pek a. Amah Chungnunga chuan ngâi ho viau mah se, a thiante ho, a thingtlâng pui te chuan kan ngawihsan thei ngang lo. In thurualin Lehkhathawn kan ziak ta a, mahse amah Zuali berin School a rawn kal chhunzawm tak loh avangin ti hian keiman ka kawl tha ta reng a, zanin a ka han phawrh chhuak leh chu lung a lêng duh ngei mai, a nuihzat thlak angreng bawk a. He Letter kan ziah pui, ka thingtlâng pui te khan lo chhiar ve tak maw?

Duhtak Zuali,

                   Hei kawng chhe tak karah kan khaw Bus ngeiin kan khua chu ka han in sawh thleng ve leh ta hlawl mai a. Kawng tluanin i hmelthatna leh duhawmna mai bakah i mi hmuhsitna tawngkam kha ka thinlungah hian a châm reng a, "chhuahna ril" min tih kha theihnghilh ka tum nasa khawp mai, mahse ka mitthla ah i hmelthatna a châm reng a, chu hmel chuan hmuhsitna tawngkam kha zet kha a chhawm tel tlat si avangin ka theihnghilh thei ta ngang lo a ni e. Kan khua ka thleng chu ka nû leh pâ, ka unau ten min lo lawm a, kei pawhin hun dang zawng aiin ka hmangaihna a zual thar leh in ka hria. Keini thingtlâng mite hi chu heti tlat zel hi kan nia. Kan unau te, kan chhungte hmundang atanga lo haw an awm hi chuan Lersia zin hmuak an sawi ang mai khan khawtlâng in kan inlawm der ve  thin ani. En teh Zuali, i chênna khawpui ah khan hetiang hi i tawng ve ngai em? Kei i mi hmuhsit em em hi chuan heng hmangaihna, duhsakna leh inlawm derna te hi kan khua, thingtlang mite ngei hnen atang hian ka dawng thin asin.

                 I chapo na leh nangmah 'NI' i intih ve em em na te nen khan kan khua, THINGTLÂNG ah hian rawn zin ve rawh ti dawn ila, nang chuan i hreh lo pawh ani thei, keimah zawk hian i rawn zin tak tak ang tih ka hlau ani. A chhan chu maw Zuali, i mit hmuhah hian kan khua hi ka sit dawn reng reng lova, ka zahpui bawk hek lovang, ka zahpui tur chu nangmah zawk kha i ni asin. Inti khawpui mi takin i leng hawh hawh anga, inti hawihhawm takin mi i han be kual anga, inti Mizo ve fahran in kan thingkhawn te thla i han lakpui vel anga, i thinglung tak chuan i hmusit dawn tho tih ka hria. Khawlâia ran ek alo awmin i han ner kual anga, kan Lungdawhah te thla i han la anga, inti engemaw takin Facebook ah i han Post anga, mipa laktlak vak lo ten emaw 'chhe lo ve' 'cial topz' 'he nu te hi chu ka duh ani' 'ka duh che' tih vela uang thuang tak taka an rawn comment hunah, thatna zawng zawng pumbilh ta vek emaw i inti anga, chutih karah tu ten emaw   'changkang deuh deuha thlalak chu i inhmeh ve lo..hetiang hlir hian thingtlang mi ang hian in post thin rawh' an tih chuan i thinrim leh em em anga, an comment i delete bak ah, i unfriend anga, chumai bakah i Block zui leh duh hial ang. Hetiang a thingtlânga rawn zin, inti changkang tak, rawn inti khawpui mi, thlate rawn la kual a, kan in leh lo te in tih Mizo nana hmang a, lo Post kual leh vel thin, rilru taka min dahhniam tho si ho hi kan ei lo lutuk che u asin. Chutiang mi chu nang pawh i ni a, ilo zin chuan i hmel hriat nih kha ka zak dawn a. Chuvangin ka dam a, he khuaa ka la chen ve chhung hi chuan rawn zin lo hram ang che!!!

                        Kan khua ngeiah hian High School ka zo a. High School ka kal lai nun ka han hrilh ve mai mai ang che; Nang chu zingah dar 7 leh a chanve velah i tho a, i chhungte leh in awmpui te siamsa i ei a, School-a nalh lo bik nih hlau takin, a parh thei ang berin i inchei thin ti raw? Kei chu maw Zuali, High School ka kal ve lai chuan khaw fing chah rualin ka tho a, ka nu ei rawngbawlna tur tui khai turin Tuikhur kang ka nghak thin a, ka let leh velah vawk chaw vil pahin lehkha ka zir a, chutichuan hman leh hman lovin Sikul ka kal ve tawk thin. School-ah khan Assembly-a an koh chhuah zin pawl i ni thin tih ka hria. I sam rawng dan bik avang te, i chalsam uaithla nasa lutuk vang te, i nail-polish hman thin te vanga koh chhuah zin berte zinga mi i ni tih thleng khan kei thingtlâng naupang hian ka lo chik thin che asin. Keini Thingtlang sikul ah chuan khatiang kha  a awm ve ngai miah lo. Tin, engemaw natna nei nia insawi a, dawt hmanga haw dil ang kha kan ti ve ngâi miah lo bawk. Tumkhat chu Assembly-na ah luhai a i tlu kha ka lo hmu che a, rawn bawihsawm ve che tumin ka rawn pan che a, mahse ka bula ding mipa ho khan 'buaipui buaipui an ngai lo, an mipa attention lak tum dan anih saw, anih loh paw’n class test an neih dawn vang aniang' an lo tia, an thusawi chu dik nia ka rin avangin ka rawn bawihsawm duh ta lo che anih kha. Keini Sikul ah ve kha chuan damlo an awm chuan kan Zirtirtu pa ho ho khan kan kan thin a, kan neih ang ang te kan inpe tawn a, kan in diriam ve ngai lo. Tlai School banah te khan tution-class tlan bo in, khawi khawiah emaw in relh bo thin niin ka lo hria a, a dik em? Kei chu maw, tlai Sikul ban velah haw nghal mai lovin, ka nu vawk chaw tur ka zawng haw a. In thlahrung dek, hriatchhuah hlau fahran chunga in i thlen lai khan kei chu phur takin 'Nu..hei i vawk chaw tur aw...' tih pahin  in ka thleng thin. Kawngkhar i luh a, i chhungte biak hlau em em chung a, i rooma i tlan luh a, lukham hnuaia i damdawi ruih tur i thuhruk malh malh thin lai khan kei chu ka inthlak sawk sawk a,  Ar ka lawi a, Vawk chaw ka pe thin. Kan High School nun chu a in ang lovin, kan in hahdam hleih ti raw?   

                     Nang chu tui chawi pawh i ngai ve lova, Ar lawi pawh i mamawh lova, vawk chaw pek ngâi pawn i khawsa lo. Mahse kei chu ka chantawk Ar lawi, Tui khai, Vawk chaw pek te nen hian ka thla a muang a, nang zawng i neih zawng zawng leh  neih leh zel tum te nen khan inchhungkhurah pawh i in thlahrung dek anih kha. Zanriah kil alo hun a, chhungkua pawh inbe mang lovin, chawhlui in kil a, chaw hmeh tui chitin reng nen, ei chu sawi loh kan hmuh phak ve loh thil te in inchhawp remrum a, mahse chawkaw puar pawhin in ei ngai em ni? Kei Thingtlang pa hi chuan maw.. Zanriah ka kil châng te hian Bâl bai leh Antam tlak chiah te hmeh chungin ka pa hnena atangin zilhhauna leh hmangngaihna tawngkam ka dawng thin asin. Nang zawng Zuali..zilhna pawh dawng ngai lo ang ziazang hian i khawsa a, i nu leh pa te hian an zilhhau ve ngei thin che chuan ka ring a, mahse zilh thin fa ni âwm pawh hian i khawsa lova, i tawng ngai bawk hek lo. chuti chung chuan 'an khaw awmna a ril e...ek e..bal e..' te chu mi la ti khanglang a.

                       En teh Zuali  Zâwlnei chu ka ni hauh lo. Mahse nang leh keia hmalam hun hi ka hmu thei ruai ruaiin ka hria. Nang chuan lênpui tur, Bike a phurtu tur che i  zawng a, i melh kual a, kei erawh chuan kan buh tharte min phurh haw saktu tur Sakawr hawh tur ka zawng thin thung. Chak taka Bike-a in tlan lai, kawng kâwi a corner in lak lai pawha Bike hnunga chuang a, Wai Wai ila Mix pah zat thiam lai khan, Lo lam pan in mi rih aia tlem kan rit bik ang tih hlauin kan kal hlawk hlawk thin. Khawpui chep tak, tukverh pawh hawn that ngam lohna hmunah i chêng a, kei erawh Zo tlângsâng ah, zo thlifim hipin ka khawsa thung. In naupang ten infiamna tur hmun tha, kawtzawl pawh an hmuh loh laiin keini erawh kan kawt tualah thla êng lâwmin ka zâi hat hat thin. Keini’n hah takin Lo kan vat a, kan vah zawha kan Chap te alo char hnuin ‘Chapchar Awllen’ kan ti a, kan chawl ve a. Chutah nangni’n  Lo pawh vat ve eih lo chuan ‘Chapchar Kut’ tiin Lammual velah in lo lawm ve luih luih ringawt a, Chapchar Kut lawm tura hah hmasak phawt a ngaihzia hi in hre der mai si lo. Zo Culture chu  inti lawm ve hle mah ula, Zo kut hnathawh hi chu in lawm ngam lo mai pawh ni lovin a hlauhin in hlau a. Zo Kuthnathawk te chu in hmusit zawk ani lawm ni?

                          Kei chu maw Zuali ti hian ka nu leh pa te hrereng chungin lehkha ka zir zel dawn a, Post Graduate ka nih hunah chuan ka nu leh pa te beka thlan tui luang thin hi kei an fapa, thingtlang pa hian ka la hruk hul sak dâwn ani!! Nang khawpui nula hian  eng eng emaw ruih a, i hmeichhiat pui te ngaihzawn, mi bike hnunga chuan tih vel hmang hian i nu leh pa i siam nuam sa zo bik ngut ange maw chu??? Kei zawng malsawm tlakin ka zir zel ang, 'chhuahna ril' hian 'thawnthu ril' ka la rawn hrilh ang che. Chutih hunah chuan nang khawpui nula, mipa tutu ten emaw an kawp kual, nupui tak tak atana an duh loh chu kei Thingtlang Pa CHHUAHNA RILA ngei hian ka la rawn nei tho tho ang che.

                                      Dam takin le........................

                                                                                                     I Pasal tur                                                                                                            Lo neitu te Fapa Chungnunga                                                                                                                Tlinghmun ‘N’

 P.S: Kan intawh leh hma chu Bike Accident in lo thi lo la, lo OD lo hram ang che.